Dal sifayn
Gabaygan wuxu tiriyey Maxamed Xirsi 1996 isaga oo jooga Sweden. nin ay saaxiib ahaayeen oo gabya ayaa soo waydiiyey bal inuu ka soo waramo meesha uu tegey. Dabadeed wuxu yidhi Maxamed Xirsi:
Gabay waa mid kugu soo degiyo mid aad ku daashaaye
Marbaad kala dabbaashaa sidii duunyo oon wado,e
Marra kaama soo dego adoo siisan laa dahabe
Anna wayga daahnaa beryahan deelka maansaduye
Deegaankii sidaan uuga imi doobtii waan dhimaye
Bal daliisho caawaan murtida soo dalbanayaaye
Oo dunida qaybtayda aan kuu dulmarayaaye
Dal shisheeye iyo baan u kacay degello gaaleede
Daraf baan ka saarrahay arladan daadsan Qoranoowe
Deenmaarig iyo baanu nahay deriska Noorweeye
Digriiyada qabawga ah nin yimi dib uga faalooye
Diqim baraf ku ladhan yaa ka dhaca duhur dharaareede
Daruuruhu dhagxaanbay da,aan duuban oo adage
Dayaxiyo iftada soo baxdaa namaba diirshaane
Dacal keliya bay naga maraan daa,in abidkoode
Dushayada kumaan arag cedceed laba diraacoode
Afartaa dariiq doosaniyo daw ma ku hagaajay
Dihinigaaga muuqaal ma dhigay dib u xasuunaanle
Deegaanta hoosiyo dhirtiyo daaqa iyo kayntu
Waa deeq ilaah oo ku badan daantan reer yurube
Durdurraa qulqula iyo xareed daa,in aan gudhine
Durrujaana kama beermo iyo daallab qodaxdiiye
Mas dilaaya halaq daadsaniyo dulin ma joogaane
Duunyaduna kuma sii badniyo daaqley xooluhuye
Afartaa dariiq doosaniyo daw ma ku hagaajay
Dihinigaaga muuqaal ma dhigay dib u xasuunaanle
Dadka eebahay uumay waa kuman dariiqoode
Midkastaa wuxuu dood ku celin taydu waa dahabe
Kolse haddaan dariiqii alliyo diinta lagu toosin
Waa dalaal waxay aadamuu darajo moodaane
Haddii aan daliilkiyo sharciga duulkan la abaaray
Waxay duunyo dhaamaan maliyo ducufka xoolaaye
Damac kuu qabsado waa halkay dani tidhaahdaaye
Goobtii dahsoon iyo wadadu uuma doorrana,e
Damiirkay ka wada mayd yihiin diinna laga maydhye
Dumarkaa is guursada raggana daaba hadalkiisa
Misna duunyo dhaqideeda iyo dahab samayntiisa
Ama daaro sida loo dhisiyo dalag abuurkiisa
Dunji bay ku leeyiin khalqigu kala dadaal roone
Dhamaad
———————–Maxamed Xirsi 1996——————————