Salaama
Maansadan waxa tiriyey Maxamed Xirsi Guuleed 07/07/1997 isagoo jooga dalka Swedan.
Sidaan hubo laba tobnaad
Anoo da,da sare ka maray
Asseen soddon weli kamilin
Ayaan surmo oodan iyo
Kun saymiyo eed galee
Sideetan qofkii jiree
Siday dad la daaq lahaa
Maxaa saxariir aduun
Salaama,e soo qabsaday
Sifaa Aadame cabdow
Wax sadar buug lagu qoriy
Wax gabay lagu saafa iyo
Sarbeeb ku tilmaamisiyo
Wax uu sawir qaadi karo
Sidaan qabo igala badan!
Sarkhaan iyo dawdariyo
Sakhiif iyo jaahil iyo
Danseeg iyo saaqid iyo
Dabbaal soori qaadatiyo
Sawaab dhoqorjaaya iyo
Dhabcaalka safkiisa iyo
Waxaanan sifayn karayn
Ayaan subaxdii gashaba
Suuq weyne ku qaabilaa!
Waxaan ka siqsiqi lahaa
Sallaamo ka fuuli laa
Ayay dad u soof tagaan
Waxaan maro saari laa
Sahaalo ku dhaafi laa
Ayuu saqajaan qodaa
Ka soo safriyaa xumaan
Waxaan sebi qoonsadeen
Sakaaro ka biirsateen
Ayaa marmar suuq galoo
Qof siidh xumi biirsadaa
samaan Hadal aan u idhi
Ujeeday sintiisa fiican
Maxaa si xun loo macneeyey
War aan saddex erey ku sheegay
Intuu sarrif beena yeeshay
Muxuu soddon iiga baahday
Ruux aan qalbigeyga siiyey
Ku sooray wax aanan haysan
Ka siiyey cid aan u quudhin
Halkaan ka sugaayey xeer san
Muxuu dibdib ii salooshoo
Fadeexado ii ameeyay?
Sabaalo wax aan ku waayey
Maxaan sabir uuga leexday
Intaan sahashaday amuur
Muxuu socod ila fogaadey
Qof aan si yar uugu baydhay
Sabaanno ka qoomamooday
Qof aan sumcadiisa dhawray
Muxuu saxariirkay maagay
Naftayda la doonay saymo
Markaan sigtay uun ogaadey
Sokeeyahay ruux ahaa
Intaan sababo u cuskaday
Muxuu qalbigeygu suufoon
Salaanta ka qaadi waayey
Aduunyadu waa sidaa
Sanooyin qof aad jeclayd
Ayaad sikin kaga tagtaa
Dad waa kala soocanyahay
Darbaa lala socon karaa
Kuwaa si kastaba aqbala
Qofkii sare kaaga muuqda
Samaan higso baa haboon
Sokeeyaha dhawro oo
Ha saydhin ayaa haboon
Cidii kula siman khalqiga
Sidaad adba jeceshihiyo
Saaxiib wacan baa haboon
Qofkii dib u socodaheen
Sinaba kuu raacahayen
Salaama dheh baa haboon
————-Maxamed Xirsi 1997———————–