2. Gabayga 2aad (Jawaab)

Date: Sat Mar 17, 2001 11:41 am
Subject: Re: “Burco Boodhlay” Gabay

Salaamu Calaykum Dhammaan.

Waar maxaa ninka looga aamusay!!!

Waan ka xumahay inaan ka hadlo wax ka baxsan topic-yada qiimaha leh ee
golaha is galaa baxaya. Laakiin ogow madal waliba waxay leedahay Hormuud iyo
Hadhaa oo waa kii Hadrwaawi lahaa
Horuu orod Faarax
Horweynka jiciirtay
Hadhaaga u jooji
Bal maanta intaan hadhaaga ku biiro maan mar kale idinku sooro
Maanso-ku-sheegaygii laaxinku ka buuxay.
Waxan filayey in jabaabiirta maansa-ruugga ah ee golaha ka buuxdaa wax
odhanayso ninka Bashiir ee ku gardarrooday Burco. Ma ahan nin loo jawaabo
waayo
1. waa arrin ka baxsan ujeedada golaha loo abuuray
2. Waa cay aan laga jawaabi karin waayo waxay kugu kelifi kartaa inaad
dalkaagii badh caydo.
Cayi waa Calyo’e bal an laba eray oo Ku-sii-sug ah idhaahdo bashiir oo aan
ku ammaanayo siduu dumarka reer Burco uga reebay qaniinyadiisa tabarta
daran.

Waxan idhi

Bismillaahi gabay waa intoo lagu bilaabaaye
Ba’naantiyo xumaatana waa inaad beri ka yeeshaaye
Haddaan pointku kuu muuqan waa laga bariistaaye

Anna maanso waataan bennedey beretenkeediiye
Naf waliba waxay biirsataa lagu bariiyaaye
Ballankii Ilaahay qof jaray naarta loo badiye

ilaahay janada haw ballaqo baabkay dontaba’e
Sidii boqoraddii loo bud dhigay wayska baal maraye
Haddii anan baroor diiq ku jirin kama boqooleene
Baxnaanada waxaan dhawr lahaa biliyo dheeraade

Caanuhu hadday badhax noqdaan waa wax kaa ba’aye
Basar waxan lahayniba ileen waa bili xumaadaane
Ruuxii basaas qaba inuu baano ma ahayne

Darbaan maanso inay baahiyaan uba bannaanayne
Buunshaha raggii cuni jiraa noo buraanburaye
Weligeyba waan baacsan jirey baarka wiil fidhaye
Hadduu adiga buur kula ahaa niniyo baabkiiye

Waxa baradan loo soo cayimay wayska baal mari’e
waatii dedaal loo ballamay laysna beegsadaye
Waatii badbaada dalkii buunka loo tumaye
bar-tilmaanku waatuu ahaa yaan la baylihine
Wacadkii inaad badhi-furta kuguma beegnayne

Nin waliba bartuu saanyaduu bilic ku sheegaaye
Burco’se waxa Ilaahay ka dhigay barasankeenniiye
Berbera iyo Hargeisay u tahay biixiyaa kaba’e

Beerkiyo wadnahay nooga taal bilicsamaanleeye
Biyaheeda ruuxii cabbaa baahiday tiriye
Goortii abaar baahdo ee beledku qiiqaabo
Burcadka iyo subaggaa abtow la isku baantaaye

Dalkuba waa bandoow haddaanaan bixinnin xoolaaye
Wanka badhida weynliyo lo’doo baraha roobaada
Waxa badaha loo dhoofiyaa Bogiyo Heemaale

Baansiinka jiifaan dhawaan kala baxaynaaye
Qayraadka buuxaa ka weyn buurahoo kale’e
Wax busaarad ay noo jirtaa boqol kunoo mayle

Waa meel an ruuxii bartaa kuba bukoonayne
Boqollaal kunoo ruux ayay tahay bustaankoode
Barbaartii Xabuushaa degtiyo baha Magaadleeye
Beydkii Makaa lagu maslaa barakadeediiye

Ruux baaban mooyee ma naco meel ballaysinahe
Badda Eyl Bareeda iyo Qaw taniyo Boosaaso
Baydhabo bacaadkii markiyo beladadii xaawo

Benderkii kismaayod ilaa taniyo baardheere
Anigana baloodhkaa burcaa iiga khayr badane
Budhka waxan u sidannaana waa Baase ruux wada’e
Ruuxii badraanaan madaxa uga bukeynaaye

Bushimaha warkii aad ka tidhi iyo baadilkiyo qooqa
baalidu bah kale waa taqaan belo ka sheegeede
Inayse teeda ay baylah tahay bedenku siin waaye
Kugumay bannaanayn inaad beentan fidisaaye
Booxaalligaagaan ka garan biiq inaad tahaye

Kolka beeshu ay nabad tahaad nagu belowdaane
Banka lama fogaataane waad bara habowdaane

Anigoon dalkiinana bayimin belana sheegsheegin
Biiroo inaad soo cabtiyo inad Baraarowdey
Labadaa midkood ii bayimi waa ballamaynaaye

Siciid Cabdull

5. Gabayga 4aad

Date: Sun Mar 18, 2001 9:47 am
Subject: Bulsho( Maanso cusub)

Ducoqabe:

Maansadan bulsho waxay soo baxday 16 Maarso 2001 waxaanay jawaab utahay
maansadii Burco boodhwayn ee uu tiriyey mudane Bashiir Hirsi Guuleed.
Inkastoo aan markii hore dhowr jeer ka tashaday inaan ka aamusnaado
sababtoo ah maaha wax laga jawaabo arrimaha soo socda awgeed:

1. Marka ugu horraysa waa gabay dheeg waxaana sidaan u arko Bashiir
kasoo dheegtay maansadii Mohamed Nuur Fadal gaar ahaana baytka lixaad
ee maansada bashiir waxaa uu yidhi: naga badi balawaynta iyo buuq aan
dhamaanayne. Waxaan u arkaa inuu Bashiir kasoo dheegtay :
“naga badi isaaq beenta iyo baalixooftada e,
waxaa seh biligu naga taagan yahay maalintii balo’eh”.

2. Bashiir waxaa uu golaha keenay arrin aan golaheena caado u ahayn,
waayo? Forumku wuxuu arrimaha waddanka ka eegaa dhinaca toganaha ah(
positive side), mana siiyaan dareen badan waxyaabaha tabanaha ah
(negative side) marka laga reebo arrin markaas taagan oo toosin u baahan
sida sixidda maamulka iyo hogaanka dalka. Markaas Bashiir waxaa uu
jebiyey caadadii forumka oo uu gabay balaqsaawir dhulka la dhacay meelo
dalka kamid ah.

3. Bashiir waxaa kaloo ku xadgudbay hab dhaqanka suugaanta, taas oo ay
suugaanta ka xaaransantahay inaan loo isticmaalo si khaldan sida iyadoo
lagu caayo qof, ama koox ah, beel ama degaan. Waxaanan ognahay in
markaan u noqono dhinaca gabayada laga guulaysto had iyo jeer qofka
caytama. Cayduna ay ka reeban tahay suugaanta. Somaliduna waxay ku maah
maadaa AF CAYTAMAY NINKIIBUU KU YAAL Waxaanan odhan karaa Bashiir xeer
suugaaneedkaana wuu jabiyey. Markalena waxaa la yidhi: NIN WAYNOO HADAL
KA DHACAY WAA GEED QOLOFI KA DHACDAY.

4. Waxaan ku jirnaa hadaan Somaliland nahay wakhti adagoo hujuum lagu
hayo hasheenii maandeeq loona baahan yahay inaan ka shaqayno sidii aan u
ahaan lahayn kuwo midaysan si aan uga hortagno dhibaatada iyo maleega
loo gaysanayo dalkeena. Sidaan ku arkay Bashiir maansadan iyo maansadii
hore ee uu tiriyey ee shiinlayda ahayd waxaa uu isagu xiiseeyaa
xurgufaha jira iyo arrimaha daakhilga ah isagoo markaas mar walba isku
dayadaya inuu qaab suugaaneed ku sheego boogaha jira oo aanay noqonayn
mid dadka isusoo dhawaysa ee noqota mid wax sii kala fogaynaysa.

Walaalkeen Kaysar oo arrintaas ka hadlaya wuxuu ku tilmaamay tixan la
waysdaarsanayo kuwo lamid ah tixii guba. Waxaanan u arkaa in maansadan
Burco boodhwayn aanay ka dhicin tixdii Cali dhuuxee ka bilaabsay.
DOQONKII OGAADEEN DOOLLO LAGA QAAD——) Waxaanan ka codsanayaa
walaalkay Bashiir inaanu u noqon arrimahaas. Suugaantiisa iyo waayo
aragnimadiisana ardaaga uga faa’ideeyo dhinaca toganaha ah ee dantu ugu
jirto dalkeena iyo dadkeenaba.

5. Ugu danbayna Waxaanan leeyahay Bashiirow ha noqon doqontii la
yidhiye “il bay leedahoo ishaasna cidda xigay ku eegtaa”. Waxaa kaloo uu
ninkii hasha igadhka soo godlay ee intay meesha yaree daloosha ka
ursatay dhaqaaqday wuxuu yidhi: ” AFARTABA ALLA GOO, MAQAARKANA HALKA
DALOOSHAY URSATAA.”
Waxaan kaloo odhan lahaa Bashiir wax walba run moodaa dadka u liitaa la
yidhiye, dacaayadahan iyo kaftanka aan turxaanta lahayn ee udhaxeeya
magaaloyinka Maandeeq haw qaadan si serious ah waayo wuxuu yidhi Farah
Nuur:

“Namiimiyuhu warkuu sheegayaa
nacas run moodaaye anna nadartu
wixii aan arkaan nacam idhaahdaaye”.

Hadraawi dhimashadii Lixle:-

Saqda dhexe dhawaaqii
dhiiladii haweenkiyo
dhalantiyo duqaydii lagu
aasay dhoobada.qayladii
dhalaankiyo ma ilaawin
dhagartii mana dhaafin
godobtii mana dhigin hubkii weli.

Mohamed Ibrahim Warsame:

Waxaan daanka soo marin dalqadaaba celisee
wax dareenku igu jiro ninkii dardaryow taas
dameero loo sheeg, dirxi iima dhuuntee midho
daray nin jecelo ku liq adiguba duuduub.

Mohamed HaashiGaariye:

Nin dawee la leeyahay dembi uu badi leeyahay
Xalka doon la leelayahay, isaguu u daranyoo
Inuu daaro ma oggola daaraanta milalka leh

Maxaan hordhaca ku horraadin
horta maaban heesta kugu horo.

Wuxuu yidhi:
————————————————————————

Bimillahi waa badhaadhiyo
barakadii rasuulkee
wixii lagu bilaabana
waa lagu bad baadaa
Bashiirow barqadii shalaan
helay balwadaadiiye
baabuurta baladka gooshtiyo
badhi walahaa sidaye
haddaan Burciyo ka sheekeeyey
bandarii kale Maandeeq
barbaartana siiyey barashiyo
bushaaradii baladkooda

Ma baalmarine bulshadaan
rabaa inaan u baahshaaye
ubiniixiyo barwaaqadiyo
badhaadhaha baladkooda yaale
adba bannaanadaan baraarka
ku celin jirtaad buun buuninaysaaye
malaa Burcaad booqasho
ku gaadh tidhiyoo balaaneet
kale jinku kuu baqoolshuu
Burco kuugu sheege

Burco waxay ku leedahay
barashaday adaan qabin
baxsanow hay nicin
aan baran barbaartiyo
bulshadaydu waxay tahay
booqasho iigu kaloo
ha baraqnuglaanine
beer jileec ma fiicnee
warka beenawaaska dhaafoo
haka baqan bilaawahiyo
budhkanay sitaane, Bari
iyo Burcaba bandarkaagii
weeyaan badhtankeeda
kaaloo bustahaaga dhigo
oo beryana ku noolow

hadday boodhwayn tahay Burco
Waa bandarkii labaade Maandeeq
Boodhkaad ku caydaan ka bishaa
baladkan Yurubaan ku noolee
Buska iyo siigadu waa waxay
bulshadeena kaga bilanyiine
waa waxa bilistoodana
ay dadka uga bidhaamaan

Boodhkeedu dux weeyaan
siigadadeena waa barakoo
baraarkaa ku naaxoo, waa
daawo rabbi noogu deeqaan
kaga bogsano cuduradoo
ka udgoon saxansaxada roobkee
Boqornimadu waa hibo baarigu
bixiyaa, baladwaliba boqor
buu leeyoo laga bidhaanshaa

Arooribaan boga ku
foofshaa baarqabku
ku doobyaa gaawo
xoorleh ku malaa
kalluun bad ku jiriyo
binni uma ogi bariise
kala saar Bashiirow
bad iyo bannaanoo
Burciyo bariba barashaa
kuugu dhimane
banaanadiyo bandarada
Maandeeq bilicdooda
mooyee inaan been ka sheegoo
barobagaande ka fidiyoo
boogahooda tiriyoo
waan ka bilanee
bi’iwaaye Bashiirow
bandarka xaal mari

Budhkiyo toorayda dhaqan
baan uleeyoo bilaawaan
baalaha ku qaataa
budhbaan midigta ku haystaa
bidixdaan ka laafyoodaa
uma sito baarcadda Bani”adamee
Cuudkaan ku raacaa
Bahalaha iyo weerahaan
ku baacsadaa, been
hadaanan sheegayn awoowgaa
Geelaa sidan jiray bilaawoo
kaaga celin jiray bulcaddee

Burco waa degel nabadoo aanay
gubin balo laga soo baceeyey
bandaraadiyo banaanadaad
balwadaada ku sheegtee
beelnimadu waa wuxuu
ku badhaadhay baladkeenu
abiyo isirba basarkaad
kusoo babaartay weeyaan

Bashiirow haddaad baladkale
Kunooshoo baasboor ajanabi
kuugu jiro boorsada muran
waxaanu ku jirin bannaanadaad
ka timid beelo inay ka taliyaan
haybsigiyo bahnimadu waa
nidaamkaan bulshooyinka
kale ku dhaafnee

Burciyo Boocane, Berberiyo
Badhan, Booramiyo
Bandarkii Hargeysaba waxay
kuugu baaqayaan bari
aan fogayn booqasho
inaad ku gaadhaa, busaarada
Kaa bidhaamaysiyo
basaastaa kaagasoo bi”i.

adoon gabay yaqaan noqon
waxaad baradii maansadee
Burco ugu maagtaay geeraar
bixiso weeyaan, ha bidhaansan
Burciyo bari yaan bulayga lagugu
tuurinoo indhaha laydhi kaa marine.

Macasalaama,
Abdi Abdillahi Hassan, Holland

6. Gabayga 6aad

Date: Tue Mar 20, 2001 8:49 am
Subject: Re: “Burco Boodhlay” Gabay

Waad salaamantihiin akhyaarta golahaay.
Waxaan waxyar ka odhanayaa gabayadii beryahan socday,anigoo aad uga hela
gabayada iyo suugaanta hadana tani waxay ila noqotay yaab waayo geeri baa
ina haysay oo ALA HAU NAXARIISTEE AAMINAA DHIMATAY.
Waxaanse layaabaa waxa REER HARGAYSA burco ficiltamaan,waxaa la rabaa in
hargaysa la barbar dhigo caasimadaa aduunka ee maaha in la yidhaahdo burco
waxaas malaha oo hargaysaa leh, waa waxaanu anagu qaadhaan kiisa dhiibno.
Hadaba waxaan leeyahay tixdan gaaban ee aan Bashiir rabo inuu bal dib ugu
noqdo taariikhdii gabayada cidii gabyi jirtay iyo wuxuu gabaygu ku haboonaa.
Waxaan idhi.
Ba`da gabay bashiiroow ma tirin beri samaadkaaye
anigoo barbaaraan ka hadhay ba iyo wowgeede
benderkaan ku koray iyo reer burcay tahay bariiskoode
bakhaaraan ku kaydshaa ileen way burqanaysaaye
berberaan ka dhoofsaa tan iyo boonta yurubeede
iyadoo bucshiraday misana boyntu dhigaysaa
buuhoodle,caynabiyo sheekh bilanoow oodwayne
buuraha saraar iyo badwayn bananka ceeldheere
balidhiig yo beer iyo bisiqa baaburaa dhiga
beledkaa togdheer bay u tahay baadka soobaxae
alaylee inaad buurjaftaan kuu bandhigayaaye
bartaankaa filiyo ileen meeshaad uga booday
alaylee bashiiroow ileen hadalku kaa baydhye
barwaaqiyo israac baanlahaa beledka gaadhsiiye
badarkiyo ana waxaan lahaa beerta la xagaafe
qaalmo baarcad iyo waxaanlahaa buushahaw qubae
boodhkaad sheegtay iyo waxaan lahaa beebab hoosmariye
bada waxa dhex jiifaan lahaa yaan la baylihine
badroolka iyo sibidhkaan lahaa maan lasoo boxoe
marsadaa berbera iyo waxaan lahaa saylac bino saare
alaylehe bartaan kaa filiyo meeshaad uga booday
alaylahe bashiiroow ilayn hadalkii kaa baydhye.

waqtigoo igu yar ma jecli inaan hadalka sii badiyo waxaan u malaynayaa nin
yidhina ma wada odhan nin ya reeyeyna waxba kama tegin.
waa Jama Hirad Yusuf
Minneapolis,Mn